Partido Patriotico di Aruba

Partido
Patriotico
di
Aruba

Home

List
2009

Aruba, 21 di mei 2005

Na: Lectornan riba nos Web-page

Srs,

Bon bini…! Riba e WEB-page di Partido Patriotico di Aruba (PPA) cu nos a inicia especialmente pa nos pueblo di Aruba y tur otro interesadonan den nos organisacion politico PPA.
PPA ta un organisacion politico cu a worde funda pa sr. Juan E. Irausquin na 1949 y cual a worde cambia juridicamente pa por cumpli cu e ley nobo pa eleccion na ana 2004.
Durante e 55 ana di nos existencia nos a sirbi nos pueblo riba TUR nivel politico den Reino Hulandes. Na Aruba primeramente riba nivel Insular. Den Antiyas riba nivel Central y desde cu Aruba a logra su Status Aparte nos ta presente riba nivel di pais Aruba den representacion di nos pueblo.
E representacion aki a hiba nos den nos lucha pa representa nos pueblo den 1e y 2de kamer Hulandes.
Dilanti gobierno di Reino. Na diferente Conferencia di Mesa Redonda pa contribui na e futuro y bienestar general di nos pueblo.

Partido PPA un dado momento a keda sin representacion den parlamento di Aruba. Pa otro partido politico esaki lo a nifica desintegracion di e partido, pero NO pa PPA.
Bao liderato di Benny Nisbet a hiba un oposicion pa 7 ana pafor di parlamento te ora cu pueblo a duna un mandato di 2 asiento pa nos regresa den sala di parlamento basa riba nos filosofia UN CAMBIO REAL.

Un CAMBIO REAL pa PPA a nifica un esfuerzo pa cambia e ambiente politico riba nos isla. Un esfuerzo pa cambia e ambiente negativo pa positivo, un esfuerzo pa implementa respet den politica arubiano pa otro, un esfuerzo pa hunto sirbi bienestar general.
Practicando esaki den parlamento a duna un resultado cu fraccion di PPA a logra hana sosten di sea e parlamento complete(Unanimamente) o sea 2/3 parti a sostene ideanan y proposicionan di fraccion di PPA, un fraccion den oposicion.
Practicando e politica fresco di respet pa otro, PPA a hana un contrincante politico den AVP cu a dicidi di bende pueblo cu PPA ta mucho aliado di MEP. Esaki NO ta berdad. E berdad ta cu PPA ta ALIADO di pueblo, PPA kier sirbi bienester general di pueblo.

Durante e eleccion aki, abo pueblo tin e oportunidad pa husga: Ki sorto di politica bo kier continua riba nos isla….? Un politica na unda partido(nan) y miembronan di parlamento cu e ricibi sosten di pueblo kier funciona como enemigu di otro, mientras nan ta forma parti di e mesun pueblo Arubano…..? Of bo kier sostene un politica esta un esfuerzo di PPA pa trece un CAMBIO REAL den politica y establece e fundeshi pa futuro di respet pa otro den politica, creando e ambiente pa realmente por traha na bienestar general di e pueblo arubano.

E titulo di nos programa pa eleccion ta PROGRESO PA TUR..! Pakiko …? Pasobra nos organisacion ta convenci cu mientras nos Isla a pasa den un progreso.. un gran cantidad di ciudadano a keda atras ! Nos kier ofrece nos pueblo PROGRESO PA TUR ciudadano biba riba nos isla.
Esey ta nos meta sagrado pesey mi kier a termina e introduccion na e momento aki sperando cu despues cu bo pasa den nos WEB-page y analisa e posicion di PPA riba varios punto importante. Cu abo lo por bira miembro di nos partido, eventual campanador y SIN DUDA vota PPA…!

Na nomber di directiva y Conseho di PPA
Benny Nisbet, Lider Politico di PPA